MST - Kumpulan Umpasa Batak

 Kumpulan UMPASA Batak

Umpasa Tintin Marangkup

Jumpang ma ni luluan

dapot na jinalahan

Ima dongan sahaholongan

dohot dongan sapakkilalaan.

Hot pe jabu i 

sai hot doi margulang gulang

Sian dia pe mangalap boru bere i 

sai hot doi boru ni tulang.

Aek sihoru horu 

tu sampuran Siguragura

Rap leleng ma hamu mangolu

sahat tu saurmatua.

Binsar mata niari

poltak mata ni bulan

Sai tubu ma dihamu boru namalo mansari

dohot anak nagabe raja panungkunan.

Ni usung ma palangka

tu Lumban Siborotan

Tusi hamu mangalangka

disi ma hamu dapotan pansamotan.

Sahat sahat ni solu 

sahat ma tu bontean

Sahat ma hamu leleng mangolu

jala sai sahat ma tu panggabean.

Umpasa Mangulosi Penganten

Rimbur ni pangkat ma tu rimbur ni hotang

Tung aha pe di jama hamu sai ima parohon pasamotan..

Hotang hotari tu hotang simarhora hora

Sai gogo ma hamu mansari jala tibu ma hamu mamora.

Sahat sahat ni solu sahat ma tu Labuan

Sahat ma hamu leleng mangolu sai diiring iring Tuhan.

Andor has tu andor his 

andor simartolu

Sai rap horas ma hamu rap torkis 

jala dapot ngolu ngolu.

Bona ni aek Puli 

di dolok Sitapongan

Sai ro ma tu hamu akka nauli

jala sai dor ma nang passamotan.

Sahat sahat ni solu 

sahat di rondang ni bulan

Rap ma hamu leleng mangolu

jala rap si oloi Tuhan.

Umpasa TunaBaru Marbagas

Dakka ni arirang

peak di tonga onan,

Badan muna naso jadi sirang

tondi mu marsigomgoman.

Giring-giring ma tu gosta-gosta

tu boras ni sikkoru,

Sai tibu ma hamu mangiring-iring huhut mangompa-ompa

anak dohot boru.

Rimbur ni Pakkat tu rimbur ni Hotang,

Sai tudia pe hamu mangalakka, sai tusima hamu dapot pansamotan.

Dekke ni sale-sale, dengke ni Simamora,

Tamba ni nagabe, sai tibu ma hamu mamora.

Sahat-sahat ni solu, sahat ma tu labuan,

Sahat ma hamu leleng mangolu, jala sai di dongani Tuhan.

Sahat solu, sahat di parbinsar ni ari,

Leleng ma hamu mangolu jala di iring-iring Tuhan ganup ari.

Mangula ma pangula, dipasae duhut-duhut

Molo burju marhula-hula, dipadao mara marsundut-sundut.

Ruma ijuk tu ruma gorga,

Sai tubu ma anakmuna na bisuk dohot borumuna na lambok marroha.

Anian ma pagabe tumundalhon sitodoan,

Arimu ma gabe molo marsipaolo-oloan.

Gadu-gadu ni Silindung, tu gadu-gadu ni Sipoholon,

Sai tubu ma anakmuna 17 dohot borumuna 16.

Andor hadukka ma patogu-togu lombu,

Sai sarimatua ma hamu sahat tu na patogu-togu pahoppu.

Umpasa Manjalo Tintin Marangkup

Bulung namartampuk, bulung ni simarlasuna,

Nunga hujalo hami tintin marangkup,

Dohonon ma hata pasu-pasuna.

Hot pe jabu i, tong doi margulang-gulang

Sian dia pe mangalap boru bere i, tong doi boru ni Tulang.

Sai tong doi lubang nangpe dihukkupi rere,

Sai tong doi boru ni Tulang,

manang boru ni ise pei dialap bere.

Amak do rere,

dakka do dupang,

Anak do bere,

Amang do Tulang.

Asing do huta Hullang

asing muse do huta Gunung Tua,

Asing do molo tulang,

asing muse do molo gabe dung simatua.

Umpasa Ni Naposo Bulung

Jolo tiniktik sanggar laho bahenon huru-huruan,

Jolo sinukkun marga asa binoto partuturan.

Tudia ma luluon da goreng-goreng bahen soban,

Tudia ma luluon da boru Tobing bahen dongan.

Tudia ma luluon da dakka-dakka bahen soban,

Tudia ma luluon da boru Sinaga bahen dongan.

Manuk ni pealangge hotek-hotek laho marpira

Sirang na mar ale-ale, lobianan matean ina.

Silaklak ni dandorung tu dakka ni sila-sila,

Ndang iba jumonok-jonok tu naso oroan niba.

Metmet dope sikkoru da nungga dihandang-handangi,

Metmet dope si boru da nungga ditandang-tandangi.

Torop do bittang di langit, si gara ni api sada do

Torop do si boru nauli, tinodo ni rohakku holoan ho do.

Rabba na poso, ndang piga tubuan lata

Hami na poso, ndang piga na umboto hata.

Umpasa Batak Laho Mangampu

Ni durung si Tuma laos dapot Pora-pora,

Molo mamasu-masu hula-hula mangido sian Tuhan,

Napogos hian iba, boi do gabe mamora..

Songgop si Ruba-ruba tu dakka ni Hapadan,

Angka pasu-pasu na ni lehon muna,

Sai dijangkon tondi ma dohot badan...

Mardakka Jabi-jabi,

marbulung ia si Tulan

Angka pasu-pasu na pinasahat muna,

Sai sude mai dipasaut Tuhan...

Naung sampulu sada,

jumadi sampulu tolu,

Angka pasu-pasu pinasahat muna,

Sai anggiatma padenggan ngolu-ngolu...

Naung sapulu pitu,

jumadi sapulu ualu,

Angka pasu-pasu pinasat muna hula-hula nami,

Diampu hami ma di tonga jabu...

Turtu ninna anduhur,

tio ninna lote,

Angka pasu-pasu pinasahat muna,

Sai unang ma muba, unang mose...

Habang pidong sibigo,

paihut-ihut bulan,

Saluhut angka na tapangido,

sai tibu ma dipasaut Tuhan...

Obuk do jambulan,

nidandan ni boru Samara

Pasu-pasu na mardongan tangiang sian hula-hula,

Mambahen marsundut-sundut soada mara...

Tinapu bulung nisabi,

baen lompan ni pangula,

Sahat ma pasu-pasu na nilehon muna i tu hami,

Sai horas ma nang hamu hula-hula...

Suman tu aek natio do hamu,

riong-riong di pinggan pasu,

Hula-hula nabasa do hamu,

na girgir mamasu-masu...

🤝 Horas Batak 🤝